Kush për arsye shëndetësore nuk mund të punojë për një kohë të gjatë ose vetëm pjesërisht, në raste të caktuara ka të drejtë në mbështetje financiare nga Sigurimi Invalidor (IV). IV nuk paguan vetëm para, por gjithashtu ndihmon të siguruarit, parasëgjithash në kthimin ose rikthimin në jetën profesionale.
Sigurimi i Invalidor (IV) është institucion shtetëror. Kryesisht të rriturit duhet të paguajnë kontribute për të. Kontributet për punonjësit paguhen drejtpërdrejt nga paga e tyre mujore, ndërkaq punëdhënësi e paguan gjysmën. Individët të cilët janë të vetëpunësuar ose nuk kanë vend pune duhet të pyesin në degën komunale të sigurimeve sociale (Gemeindezweigstelle der Sozialversicherungsanstalt, SVA) për mënyrën e pagesës së kontributeve të tyre.
Ata që për arsye shëndetësore (fizike ose psikike) nuk mund të punojnë ose mund të punojnë vetëm pjesërisht për një periudhë prej të paktën një viti, kanë të drejtë të kërkojnë ndihmën e Sigurimit Invalidor (IV). IV paguan ndihmën në formë të një pensioni mujor. Megjithatë, kjo ndihmë paguhet vetëm nëse të siguruarit nuk mund të rikthehen në punë për shkak të dëmtimit të tyre. IV ndihmon personat e paaftë për ta gjetur një punë të përshtatshme. Kërkesa për ndihmë nga IV duhet bërë në degën komunale të sigurimeve sociale (Gemeindezweigstelle der Sozialversicherungsanstalt).
Individët që, pavarësisht nga ndihma e Sigurimit Invalidor (IV), nuk kanë para të mjaftueshme për të jetuar, sipas rrethanave mund të kenë të drejtë për ndihmë financiare shtesë (Ergänzungsleistungen). Këto duhet të kërkohen në degën komunale të sigurimeve sociale. Është e rregulluar qartë se kush ka të drejtë për të marrë ndihmë shtesë. Ndihma shtesë financohet nga tatimpaguesit.
ch.ch / Më shumë informacione (DE)
Informationsstelle AHV/IV / Më shumë informacione (DE)
